عقارات مكة

مبروك على الارض والقرض .... مواصفات لتوفير اقل بالبناء..(صور)

فوزان100

عقاري متميز
البعض يضحك عليه من قبل العمال الليك دليل واحد متفق مع سباك على دور فيه حمامين ومطبخ ب 35 الف ريال ؟؟؟؟؟؟؟؟؟؟

ياناس ياعالم سعر سباكه الحمام الواحد الف ريال المطبخ الف ريال اذا كان ماهو مشبوك بحمام و200 ريال اذا كان جنبه حمام

وهاذا صاقعه صقع للاخير المشكله اني جيته وحذرته رد علي قال رخيص فلان ماخذه ب 40 الف


المشكله عندنا فلان وعلان اذا بنا بيت يهايط عند جماعته المستاجرين يقول بنيت بمليون وهو يخسي تلقاه باني ب 300 الف

والمشكله الاغبياء من جماعته يصدقون


سعر بنا بيت عظم 400 م

400*120شغل عمال =48000

عدد 3 حمامات ومطبخ = 4000

المبلط 15 ريال للمتر *400=6000

البويه قطوع دور كامل 4500

المجموع = 62500

الابواب الباب الواحد 450 كبس مصري

الدرايش 250 ريال للمتر

الحديد 550 ريال للمتر كبس درفتين

دور مايتعدى 400 الا اذا كان مشطب تشطيب غالي من سراميك وابواب سنديان وغيره


كلامي ياذكي عظم بالمواد مهو شغل يد بس .

يعني حط في حساباتك تكلفة الحديد والخرسانة والبلك والإسمنت والحفر العزل والدفان وغيره . وبعدين 400م2 هذي مساحة الأرض لكن أمتار البناء (دور ارضي مع دور اول مع ملاحق السطح والخزان والبيارة والسور ) حوالي 650م2 ولعلمك الحديد لحاله مكلفني فوق 70 الف ريال (الطن بـ 2500 ريال) وعدد الأطنان للفلة حوالي 28 طن تقربيا.
 

فوزان100

عقاري متميز
صبحكم الله بالخير جميعاً


الحقيقة البعض طريقته في حساب التكلفة عجيبه
يقولك بيت 400م بكذا ؟؟؟؟؟؟

طيب يا أخي فصل عشان نوصل لنتيجه ونعرف انك فاهم وتفيد الناس اللي تقرأ
يعني أولاً فرق بين مساحة الأرض وبين مسطح البناء
ثانياً اذكر جميع المسطحات
ثالثاً اذكر أطوال الأرض عشان تحسب تكلفة السور
رابعاً اذكر مساحة الخزان الطول × العرض × العمق
خامساً اذكر مساحة غرفة الصرف الصحي الطول × العرض × العمق
وهكذا
وبعد ما تطلع جميع مسطحات المباني بما فيها الملاحق والسور والخزان وغرفة الصرف الصحي
اضربها بسعر المفتاح حسب نوعية التشطيب وتطلع لك التكلفة التقريبية .


حتى لو ما فصلت ، مستحيل يكلفني البيت 411 الف ريال شغل يد للعظم بدون مواد !!

ولو اجيب اغلى مقاول في العالم ما يكلفني شغل يده 411 الف

الأخ اللي رد علي المفروض يكون الشي هذا واضح له والموضوع ما يببي له فهلوة .
 

الهاجدو

عقاري متميز
خلنا نكون متفائلين
أنت شايف النتيجةcnf3:

ما شاء الله عليك . . . تبارك الله . . .

مقاول وعقاري وهامور وشريطي . . . :D

احسن شيء انك تعرف مصطلح ( التفاءل ) :D

انت ابو التحطيم في المنتدى . . . لو بيدك تأخذ من اعضاء المنتدى (2.5%) وتصب له شوي تفاءل :D
 

العطاوي a511

عقاري نشيط
كلامي ياذكي عظم بالمواد مهو شغل يد بس .

يعني حط في حساباتك تكلفة الحديد والخرسانة والبلك والإسمنت والحفر العزل والدفان وغيره . وبعدين 400م2 هذي مساحة الأرض لكن أمتار البناء (دور ارضي مع دور اول مع ملاحق السطح والخزان والبيارة والسور ) حوالي 650م2 ولعلمك الحديد لحاله مكلفني فوق 70 الف ريال (الطن بـ 2500 ريال) وعدد الأطنان للفلة حوالي 28 طن تقربيا.

انا اتكلم عن دور 500 تكفيها بالراحه وتزود وانت تتكلم عن فله كبيره تقدر تخليها من الفلل الجديده مجالس تحت وغرف فوق ويزود عندك حوش ونفس التكلفه

انت باني فله 650م تديور فيها تريله

الفله بتكلفك على كلامك فوق 800 الف الله يعينك
 

dreamland

ــــــــــــــ
الخلاصة العقاريين يقولون ان 500 الف ماتكفي لبناء دور واحد

يعني اللي بيشتري من امواله ارض كيف بيبنيها يبغاله اقل شيء 800 الف على حسبة الشريطية + قيمة الارض 500 الف الى مليون والناس تعجز عن توفيرها

النصيحة انتظروا دوركم في وزارة الاسكان على الاقل بتطيح عنكم قيمة الارض وبيطيح عنكم 500 الف قرض حسن من دون فوائد ودبر الباقي ولا ترهن نفسك لديون وتشتري من بوشرطه

هو يركب لكزس وانت تركب كرسيدا خخخخخخخخ
 

nasser1976

عقاري
حنا مايهمنا العقاريين .....عقارهم معهم و ان شاءالله يبيعونه بمليار ..... يهمنا احتياجتنا

دور واحد مايكفي عائه مكونه من ست افراد .......... الا اذا كلنا بغرفه وحده

ارض 500 متر طلع منها متطلبات البلديه ولانبي حوش بعد بس ارتداد

يبيلك مجلس رجال و مقلط و مجلس نساء و صاله و مطبخ ....... اجل وش بقى للغرف نوم !!!!!!!!!!!

القرض صحيح مايكفي للواحد يبني دورين ....... 500 الف مستحيل تبني دورين .......

طيب يبي لي فوقها 300 الف عشان ابني دورين ........ من وين اجيبها ....... سلف من بنك بعد ... اختربت السالفه

حنا نبي العقار ينزل عشان نشتري دبلكسات داخل الديره و دورين ...... احسن من ارض مادري وين على خط رياض

الله العالم انه بينزل العقار بس ماهو نزول الي نتوقعه ...... وقرض وارض لحكومه ... ماضنيت احد بيستفيد منه اذا بيبني دورين ...... ألا اذا خذا سلف من البنك ....... وكذا رجعنا للسالفه الاولى ..... راتب ممسوك 20 سنه
 

فوزان100

عقاري متميز
انا اتكلم عن دور 500 تكفيها بالراحه وتزود وانت تتكلم عن فله كبيره تقدر تخليها من الفلل الجديده مجالس تحت وغرف فوق ويزود عندك حوش ونفس التكلفه

انت باني فله 650م تديور فيها تريله

الفله بتكلفك على كلامك فوق 800 الف الله يعينك

الأرض اطوالها 20 في 20
مساحة مسطح الدور الأرضي 207 م2
مساحة مسطح الدور العلوي 213م2
مساحة ملاحق السطح 101 م2
يعني مجموع مسطحات البناء لجميع الأدوار حوالي 521م2
والأرض كانت مرتفعه عن الشارع حوالي 1.5 متر وكلفني الحفر وترحيل المخلفات 21 الف ريال لأن الأرض كانت صلبة .
هذا غير حساب الخزان الأرضي والبيارة والأسوار

الكهربائي اتفقت معه بـ 15 الف يخلص الفله كامله من تمديدات الميده إلى تركيب اللمبات والأفياش وكل شي .
والسباك اتفقت معه بـ 10 الف من تمديدات الميده إلى تركيب الكراسي والمغاسل والبانيو (عندي خمس حمامات ومطبخ)
المقاول أخذ الفله عظم بدون مواد قطوعه بـ 100 الف ريال (يعني تقريبا المتر بحوالي 140 ريال) والمشكلة أن البناء في حي ما فيه كهرب ولامويه ولا مواصلات ، لذلك كل عامل يزود عليك شوي ويقول ما حولي مطعم ولا بقاله ولو تعطلت سيارتي ما فيه ليموزينات. وعلى حساباتي المتوقع أن الفله راح تكلف من 800 إلى 900 الف ريال بعد انتهاء التشطيب.

وبإختصار حتى الآن التكلفة التقريبيه كالتالي:
1 - الحديد كلف حوالي 70 ألف
2- الخرسانة الجاهزة حوالي 78 ألف
3- البلك (معزول وغيره) حوالي 18 ألف
4- شغل يد المقاول 100 ألف
5- حفر الأرض 21 ألف مع ترحيل المخلفات
6- دفان للقواعد والميده حوالي 5 ألف
7- حارس للرش (رواتب 6 شهور) حوالي 6 الف
8- شغلات كثيرة كلفت مبالغ مختلفة مثل عزل الخزان الأرضي والقواعد والميده ، رمل بناء ناعم ،رمل مخلوط للصب اليدوي للعتب والدرج ، أجرة شيول ، أجرة رصاصة ، وايتات مويه ، مواد سباكة ومواد كهرب ، اكياس اسمنت للبناء ، وشريت ماطور كهرب كلف فوق الفين ريال وغيره.
 

nasser1976

عقاري
شكلنا طلعنا من رحمة العقاريين و طحنا في رحمة المقاولين

يعني بتقولي الحين المقاولين ماهم مزودين اسعارهم.........الحكومه رحلت نص العماله ....... واسعار العمال طارت

وين ما طقها عوجى ....... انا توقعت الوزاره تبني و توزع ..... بس مسأله ارض و قرض ....... مامنها فايده

والاخ يبي يبني دور ....... ياخي الناس تبي العقار ليش ينزل ...... عشان يسوون دور!!!!!! ....... ولا عشان يبنون زي الدبلكسات .........بس على مقدرتهم الماليه ...... لان دبلكسات المعروضه غاليه و تجاري

المهم ....... للحين ماستفدت انا ....... ولا غيري اضن و نبي حل
 

فوزان100

عقاري متميز
يعني بتقولي الحين المقاولين ماهم مزودين اسعارهم.........الحكومه رحلت نص العماله ....... واسعار العمال طارت


أجور العماله مرتفعه ، اول المقاول ياخذ المتر عظم بدون مواد بـ 90 ريال والحين بـ 120 ويمكن أكثر (حسب صعوبة المخطط وموقع العمل) ، مهو بس كذا المهارة مفقودة ، يعني مقاول باني لك جدار مايل ولا كهربائي حاط اراتفاع الافياش مترين من الأرض ، يعني يبي لك اندريه العملاق علشان يطفي النور ، الخلاصة اجور العمالة مرتفعه ومعظمهم ما عندهم مهارة وماخذين الشغلة طقها والحقها.
 
أعلى